Вода́ми Иoрда́нскими оде́ялся еси́, Спа́се, одея́йся Све́том, я́ко ри́зою, и приклони́л еси́ главу́ Предте́чи, И́же не́бо изме́ривый пя́дию. Да обрати́ши мир от ле́сти и спасе́ши, я́ко Человеколю́бец.
Галиле́и язы́честей, Завуло́нстей стране́ и Неффали́мстей земли́, я́коже рече́ проро́к, Свет вели́к возсия́, Христо́с. Омраче́нным све́тла яви́ся Заря́, из Вифлее́ма облиста́ющая, па́че же из Мари́и Госпо́дь, всей вселе́нней возсиява́ет лучи́ Со́лнце пра́вды. Те́мже, и́же от Ада́ма нази́и, прииди́те вси, облече́мся в Него́, да согре́емся, покрыва́ет бо наги́я и просвеща́ет те́мныя.Прише́л еси́ и яви́лся еси́, Свет Непристу́пный.
Креща́ется Христо́с и восхо́дит от воды́, совозво́дит бо с Собо́ю мир и зрит разводя́щаяся Небеса́, я́же Ада́м затвори́ себе́ и су́щим с ним, и Дух свиде́тельствует Божество́, Подо́бному бо предти́чет и глас от Небесе́: отту́ду бо свиде́тельствуемый, Спас душ на́ших.
Го́споди, испо́лнити хотя́, я́же уста́вил еси́ от ве́ка, от всея́ тва́ри служи́тeли та́йны Твоея́ прия́л еси́: от А́нгел – Гаврии́ла, от челове́к – Де́ву, от Небе́с – звезду́ и от вод – Иoрда́н, в не́мже беззако́ние мирско́е потреби́л еси́, Спа́се наш, сла́ва Тебе́.
Днесь Небесе́ и земли́ Творе́ц прихо́дит пло́тию на Иoрда́н, Креще́ния прося́ Безгре́шный, да очи́стит мир от ле́сти вра́жия, и креща́ется от раба́ Влады́ка вся́ческих, и очище́ние водо́ю ро́ду челове́ческому да́рует. Тому́ возопие́м: явле́йся Бо́же наш, сла́ва Тебе́.
Бог Сло́во яви́ся пло́тию ро́ду челове́ческому, стоя́ше крести́тися во Иорда́не, и глаго́лаше к Нему́ Предте́ча: ка́ко простру́ ру́ку и прикосну́ся верху́ Держа́щаго вся́ческая? А́ще и от Мари́и еси́ Младе́нец, но вем Тя, Бо́га Преве́чнаго, по земли́ хо́диши, пева́емый от Серафи́м, и раб Влады́ку креща́ти не научи́хся. Непостижи́ме Го́споди, сла́ва Тебе́.
Егда́ явле́нием Твои́м просвети́л еси́ вся́ческая, тогда́ сла́ное неве́рия мо́ре побеже́, и Иорда́н, до́ле теки́й, возврати́ся, к Небеси́ возвыша́я нас. Но высото́ю Боже́ственных за́поведей Твои́х соблюди́, Христе́ Бо́же, моли́твами Богоро́дицы и поми́луй нас.
Да убели́тся вся́кое земно́е естество́, от паде́ния ны́не на Не́бо возводи́мо, И́мже бо вся соблюда́ются, Сло́вом, теку́щими струя́ми омы́вшеся, прегреше́ний пре́жних убеже́, пресве́тло измове́но.
Мозаика собора Сан Марко, XIII век, Венеция
