Песнопения предпразднства Богоявления (2/15 января)
Гряде́т ко Иорда́ну Христо́с Истина крести́тися от Иоа́нна и глаго́лет к Нему́: аз тре́бую от Тебе́ крести́тися. И Ты ли гряде́ши ко мне? Не сме́ю, се́но, прикосну́тися Огню́, Ты мя освяти́, Влады́ко, Боже́ственным явле́нием Твои́м.
Иоа́нне Крести́телю, во утро́бе позна́вый Мя А́гнца, на реце́ Мне послужи́, со А́нгелы Мне слу́жбу принеси́, просте́р, косни́ся дла́нию верху́ Моему́ пречи́стому. И, егда́ у́зриши го́ры трепе́щущия и Иорда́на возвраща́ющася, с си́ми возопи́й воплоти́выйся из Де́вы в на́ше спасе́ние, Го́споди, сла́ва Тебе́.
Одожди́ согреше́ний на́ших, Человеколю́бче, разреше́ние, И́же Иорда́нскими струя́ми погрузи́вый прегреше́ния земноро́дных, за ми́лость вели́кую.
Пучи́на сый, Христе́, пра́вды, предгряде́ши ны́не на Иорда́нскую реку́ потопи́ти зми́я и Ада́мово преступле́ние изсуши́ти.
Возже́гл еси́, Христе́, я́коже свети́льник, честну́ю плоть Твою́ среди́ Иорда́на, и взыска́л еси́ погребе́нный страстьми́ и грехо́м о́браз, и, обре́т, удобри́л еси́ Креще́нием Твои́м, Бла́же. Те́мже пое́м Тя.
Во оде́жду свяще́нную одева́я мя, Христе́, обнажи́вшагося сове́том льсти́ваго, наг проити́ сквозе́ во́ды прише́л еси́ бла́гости бога́тством. Воспева́ю Твое́ милосе́рдие и покланя́юся чу́дному Твоему́ смотре́нию.
Изсуши́ти струи́ ища́й зло́бы вра́жия, и моря́ страсте́й уста́вити, и ве́рным очище́ние источи́ти и оставле́ние, Влады́ко, гряде́ши крести́тися во струя́х Иорда́нских.
Я́ко ла́стовица пречестна́я, провозвеща́ющая ве́сну мы́сленную, предста́ Крести́тель в зиме́ су́щим безме́рных прегреше́ний и бурю терпя́щим при́сно сопроти́вных духо́в, лука́вых страсте́й.
Минея, 2 января: https://azbyka.ru/otechnik/Pravoslavnoe_Bogosluzhenie/mineja-janvar/2
«Иоанн Креститель – Ангел пустыни». Икона рязанской школы. 16 в. Рязанский историко-архитектурный музей-заповедник.
